साउदीमा अलपत्र ३८ जना नेपाली ४ दिनदेखि भोकै

हाम्रो सन्देश संवाददाता

काठमाडौं, साउन ४ ।

साउदी अरबमा अलपत्र ३८ जना नेपाली ४ दिनदेखि भोकै भएको पीडितहरुले बताएका छन् ।

गत सोमबार बेलुकीदेखि आफूहरु भोकै बस्न बाध्य भएका खोटाङ जालपाका शेषन श्रेष्ठले बताए । गत फागुन १ गते साउदी अरब पुगेका उनीहरु सम्झौताअनुसारको काम र तलब नपाउँदा अलपत्र परेका हुन् ।
खान, बस्न, पाकेको तलब उपलब्ध गराउन साउदीस्थित नेपालका लागि राजदूतावासले निर्देशन दिएको तर अहिलेसम्म उपलब्ध नभएको उनीहरुको भनाई छ ।

सम्पूर्ण व्यवस्थापनका लागि वैदेशिक रोजगार विभागले सम्बन्धित मेनपावर कम्पनीलाई निर्देशन दिएको श्रेष्ठले बताए । उनीहरु क्याट्रिङको कामका लागि भन्दै काठमाडौं चाबहिल मित्रपार्कस्थित इम्पावर ओभरसिज प्रालिबाट सोनमार कन्ट्रक्टिङ ट्रेडिङ एडभरटाइजिङ एण्ड एडभरटाइजिङ कम्पनीमामार्फत साउदी पुगेका छन् ।

साउदी पुगेपछि ९ सय रियल मात्र पाएपछि नेपालीले एक दिन ड्युटी इन्कार गरेकाले कम्पनीले सडकमा निकालिदिएको हो । त्यसपछि खोटाङका धनीराम राई, अशोक तामाङ, अरुण तामाङ, राजन राई, जालपाका शेसन श्रेष्ठ, युवराज निरौला, डम्बर श्रेष्ठ, मेख निरौला, तेज श्रेष्ठ, नरेन्द्र श्रेष्ठ, प्रेमचन्द्र तामाङ, कमल गुरुङ, भीम तामाङ, सोलुखुम्बुका गणेश हिङमाङ, सन्तोषकुमार बस्नेत, देबेन्द्र बस्नेत, चन्द्रप्रसाद हिङमाङ, निराजन दमाई, मानबहादुर खड्का, राष्टकुमार राई, जयकुमार राई, टंकबहादुर कार्की अलपत्र परेका छन् ।

यस्तै सिन्धुलीका चम्पक सुनुवार, दयाराम सुनुवार, भरत सुनुवार, मकवानपुरका साङ्गे ब्लोन, सूर्यबहादुर बम्जन, भोजपुरका सूर्यबहादुर तामाङ, सर्लाहीका भक्तबहादुर आलेमगर, शंकर बम्जन, म्याग्दीका डम्बर नेपाली, बाग्लुङका डम्बर सार्की, डडेलधुराका तेजबहादुर दमाई, कैलालीका नेता बन, दैलेखका दीपक गुरुङ, नारायण गिरी र रामेछापका केशव खड्का अलपत्र परेको सुरक्षित आप्रवासन परियोजना सामी दिक्तेलले जनाएको छ ।

क्याट्रिङको कामका लागि भन्दै कम्पनीमा पठाइएका उनीहरुले काम गरेपनि तोकिएको समयमा तलब नपाएपछि सोमबार ड्युटी जान इन्कार गरेका थिए । तलब नदिएपछि एक दिन ड्युटी छुटाएकामा कम्पनीले कोठाबाट झोला, कपडालगायत बन्दोबस्तीका सामग्री सडकमा निकालिदिएको जालपाका शेषन श्रेष्ठले बताए ।

काम गरेबापतको तलब असार ३१ गतेसम्ममा दिने शर्त कार्यान्वयन नभएपछि उनीहरुले एक दिन काम अस्वीकार गरेका थिए । अलपत्र युवाले उद्धारको माग गरेका छन् ।